წლების წინ, კახეთში, გურჯაანში, თავისი ოჯახის ძველ სოფლის სახლში, ია იმერლიშვილმა მიწის ქვეშ საუკუნოვანი ქვევრები აღმოაჩინა — ჩუმი ჭურჭელი, რომელიც წარსული თაობების მოგონებებს ინახავდა. სწორედ ამ აღმოჩენამ დაუდო სათავე იას მარნის შექმნას.

2007 წელს, ნახშირღელეში, რამაზ ნიკოლაძემ თავისი დიდი ბაბუის ვენახის ადგილზე პატარა მარანი დააარსა. აქ ციცქასა და ცოლიკოურისგან ბუნებრივ ღვინოს ამზადებენ. ტრადიციული ქვევრის მეთოდი და ხელით მოვლილი ვენახი იმერული ღვინის ავთენტურ ხასიათს ინარჩუნებს.

ბაადურ 1933 საოჯახო მეღვინეობაა ზემო იმერეთში, საჩხერეში, რომელიც ღვინის დაყენების თითქმის საუკუნოვან ტრადიციას აგრძელებს. ადგილობრივი ვაზის ჯიშებისგან შექმნილი ღვინოები გამოირჩევა სიხალისით, დახვეწილი სტრუქტურითა და უნიკალური ხასიათით.

მეღვინეობა ართანა ოჯახურ მეღვინეობის ტრადიციას ბუნებრივი ქვევრის ღვინოების წარმოებით აგრძელებს. ანასტასია ახვლედიანი და მისი ოჯახი 2015 წლიდან ბუნებრივად მოყვანილი ყურძნისგან ღვინოსა და ტრადიციულ სასმელებს ამზადებენ. ოჯახისთვის ეს ყველაფერი ღვინოზე მეტია - ეს მათი ფესვები, თაობების მეხსიერება და ტრადიციაა.

შერმა - საოჯახო მეღვინეობაში ღვინის წარმოების ტრადიცია თაობიდან თაობას გადაეცემა, თუმცა ოჯახმა ამ ტრადიციის კომერციულ საქმიანობად გადაქცევა მხოლოდ 2020 წელს გადაწყვიტა. მარანი მდებარეობს შიდა ქართლის რეგიონში, სოფელ მეჯვრისხევში.

2007 წელს ნუგზარმა და მამუკამ დააარსეს „სიმონიკა“ საოჯახო მეღვინეობა, რომელიც მდებარეობს იმერეთში, II ობჩაში და მათი მამის სახელს ატარებს. მეღვინე ნინი ჩხეიძე აგრძელებს მეღვინეობის სამთაობიან ტრადიციას და აწარმოებს ნატურალურ ქვევრის ღვინოებს იმერეთსა და სამეგრელოში მდებარე საკუთარ ვენახებიდან.

„მარანი მილორაული“ თელავში მეღვინეობის ისტორიას 1930 წლიდან ითვლის, რომელიც 2015 წელს ახალი ხედვით გავაცოცხლეთ. ჩვენს ბიო-სერტიფიცირებულ 7,5 ჰა ვენახებში 9 სხვადასხვა ვაზის ჯიშია გაშენებული. ქვევრის ტრადიციული მეთოდისა და თანამედროვე ტექნოლოგიების შერწყმით, ყოველწლიურად დაახლოებით 7 000 ბოთლ ბუნებრივ ღვინოს ვაწარმოებთ.

იაგო ბიტარიშვილი საქართველოში ბუნებრივი მეღვინეობის ერთ-ერთი პიონერია. ჩარდახში ის ჩინურისგან ავთენტურ ღვინოებს აწარმოებს და მნიშვნელოვანი წვლილი შეაქვს ორგანული მევენახეობის განვითარებასა და ქართული ღვინის საერთაშორისო პოპულარიზაციაში.

2003 წელს დაარსებული "ჩვენი ღვინო" მდებარეობს სოფელ ბაკურციხეში. მარანი კარდანახისა და ბაკურციხის მიკროზონებში მხოლოდ ქართული ადგილობრივი ყურძნის ჯიშებს აშენებს.

მარანი „ხაჟალია“, საოჯახო მეღვინეობა, იმერეთში, სოფელ გეგუთში მდებარეობს. ის 2022 წელს დაარსდა. მარანი ტრადიციული მეთოდით, ქვევრში, აწარმოებს ბუნებრივ ღვინოებს კახური და იმერული ჯიშებისგან. წლიური წარმოება 3,500 ბოთლს შეადგენს, რაც ხარისხის კონტროლსა და ავთენტურობის შენარჩუნებას უწყობს ხელს.