ზურა მგვდლიაშვილი ნიკალას მარნის მფლობელი და მეღვინეა. კახეთში, გურჯაანის მუნიციპალიტეტის სოფელ კარდენახში მდებარე ტრადიციულ საოჯახო მარანში იგი მეღვინეობის ოთხთაობიან ტრადიციას აგრძელებს და ავთენტური, მინიმალური ჩარევით შექმნილი ღვინოების წარმოებას ეძღვნება.

იაგო ბიტარიშვილი საქართველოში ბუნებრივი მეღვინეობის ერთ-ერთი პიონერია. ჩარდახში ის ჩინურისგან ავთენტურ ღვინოებს აწარმოებს და მნიშვნელოვანი წვლილი შეაქვს ორგანული მევენახეობის განვითარებასა და ქართული ღვინის საერთაშორისო პოპულარიზაციაში.

ნიაბის მარანი ორგანული მეურნეობის მსოფლმხედველობის მქონე ორი ახალგაზრდა მევენახის წამოწყებაა. მას საფუძველი 2017 წლიდან ჩაეყარა. მთავარი იდეა ვენახში ჯანსაღი გარემოს  ხელშეწყობა და უნიკალური ადგილმდებარეობის წყალობით ცოცხალი და ენერგიული ღვინის მიღებაა. მარანი შიდა ქართლში, სოფელ თელიანში მდებარეობს. 

კონდოლი ვაინერიმ მევენახეობა და მეღვინეობა 2019 წელს დაიწყო. კომპანია ღვინოს მხოლოდ საკუთარი, სერტიფიცირებული ორგანული ვენახებიდან მიღებული ყურძნისგან აწარმოებს. ვენახები მდებარეობს თელავის მუნიციპალიტეტში, სოფელ კონდოლში, წინანდლის მიკროზონაში, რომელიც ისტორიულად ცნობილია მაღალი ხარისხის ყურძნის მოსავლით.

მახარებელი ქართულად „სიხარულის მომტანს“ ნიშნავს. კახეთში მდებარე მეღვინეობა ორ მეგობარ ოჯახს აერთიანებს, რომელთა 15 შვილიც ვაზისა და ღვინის სიყვარულით იზრდება. მინიმალური ჩარევით შექმნილი რქაწითელი, კახური მწვანე და საფერავი მუკუზანის, ვაზისუბნისა და ალაზნის ველის უნიკალურ ხასიათს გადმოსცემს და თითოეულ გულს სითბოსა და სიხარულს ჰგვრის.

2003 წელს დაარსებული "ჩვენი ღვინო" მდებარეობს სოფელ ბაკურციხეში. მარანი კარდანახისა და ბაკურციხის მიკროზონებში მხოლოდ ქართული ადგილობრივი ყურძნის ჯიშებს აშენებს.

შერმა - საოჯახო მეღვინეობაში ღვინის წარმოების ტრადიცია თაობიდან თაობას გადაეცემა, თუმცა ოჯახმა ამ ტრადიციის კომერციულ საქმიანობად გადაქცევა მხოლოდ 2020 წელს გადაწყვიტა. მარანი მდებარეობს შიდა ქართლის რეგიონში, სოფელ მეჯვრისხევში.

„მარანი მილორაული“ თელავში მეღვინეობის ისტორიას 1930 წლიდან ითვლის, რომელიც 2015 წელს ახალი ხედვით გავაცოცხლეთ. ჩვენს ბიო-სერტიფიცირებულ 7,5 ჰა ვენახებში 9 სხვადასხვა ვაზის ჯიშია გაშენებული. ქვევრის ტრადიციული მეთოდისა და თანამედროვე ტექნოლოგიების შერწყმით, ყოველწლიურად დაახლოებით 7 000 ბოთლ ბუნებრივ ღვინოს ვაწარმოებთ.

ქვემო ხოდაშენში მეღვინედ ქცეული ორნითოლოგის მიერ დაწყებულ საქმეს მოგვიანებით მეგობრები შეუერთდნენ და მეღვინეობა გააფართოვეს. ასე დაიბადა ახალი ბრენდი — გონჯების ღვინო — მეგობრობის, საქმისადმი სიყვარულისა და სიხარულის ნაყოფი.

წლების წინ, კახეთში, გურჯაანში, თავისი ოჯახის ძველ სოფლის სახლში, ია იმერლიშვილმა მიწის ქვეშ საუკუნოვანი ქვევრები აღმოაჩინა — ჩუმი ჭურჭელი, რომელიც წარსული თაობების მოგონებებს ინახავდა. სწორედ ამ აღმოჩენამ დაუდო სათავე იას მარნის შექმნას.

ლომთაძის მარანი პატარა საოჯახო მარანია, რომელიც კახეთში, გურჯაანის მუნიციპალიტეტის სოფელ ველისციხეში მდებარეობს. აქ უკვე საუკუნეზე მეტია, უწყვეტად ინარჩუნებენ ღვინის დაყენების ტრადიციულ კახურ მეთოდს. ოჯახს აქვს რქაწითელის, ღვინის თეთრისა და საფერავის ვენახები.

გაბრიელის ღვინო დაარსდა 2016 წელს, მამა გაბრიელ ხომასურიძის მიერ, მის მშობლიურ სახლში სოფ. გამარჯვებაში, ქვემო ქართლი. მეღვინეობა აწარმოებს მცირე ტირაჟის ნატურალური ქვევრის ღვინოს და ტრადიციულ პეტნატებს, პროცესი მიმდინარეობს სრულიად ბუნებრივადყოველგვარი დანამატებისა და ფილტრაციის გარეშე.

ნადელები — გურამ მაისურაძის მიერ დაარსებული მცირე საოჯახო მარანია, რომელიც კახეთში, ქალაქ თელავში მდებარეობს. ვენახები წინანდლის მიკროზონაში, კერძოდ, ნადელების ნაკვეთებზეა გაშენებული. მარანში მოჰყავთ ქართული ტრადიციული ვაზის ჯიშები: რქაწითელი, ქისი, ხიხვი, მწვანე და საფერავი. ბუნებასთან თანაარსებობისა და ტრადიციების პატივისცემით, ოჯახი ყოველწლიურად ქვევრში აყენებს გამორჩეულ ბუნებრივ ღვინოებს.

„ოდა“ 2015 წელს დაარსდა ქალაქ მარტვილში (სამეგრელო), წინაპრების ოდაში, სადაც ოჯახი 2016 წელს თბილისიდან გადასახლდა. მარანი აწარმოებს ბუნებრივ, ქვევრის ღვინოებს დასავლეთ საქართველოს ვაზის იშვიათი ჯიშებისგან. ღვინოებს აქ ადგილობრივი თემის ქალები ქმნიან, ღვინის მწერლის, ქეთო ნინიძის ხელმძღვანელობით.

„ბაწაშვილის მარანი“ ილია ბაწაშვილისა და ზაზა გიორგაძის მიერ შექმნილი საოჯახო მარანია. კახეთში, ბაკურციხის ვენახებიდან მიღებული რქაწითელისა და საფერავისგან ისინი ქვევრის ბუნებრივ ღვინოებსა და პეტ-ნატს ქმნიან. 2024 წლიდან მარანი საქართველოს ბუნებრივი ღვინის ასოციაციის წევრია.

ბიომეღვინეობა იორა 2014 წელს დაარსდა კახეთში, საგარეჯოსთან. აქ სერტიფიცირებულ, ორგანულ ვენახში მოყვანილი ყურძნისგან ღვინოები მრავალსაუკუნოვანი კახური მეთოდით მზადდება და ქართული მეღვინეობის ტრადიციებს, ბუნებრიობასა და ხარისხს აერთიანებს.

ამ მარანში მეღვინეობის ისტორია 2012 წელს დაიწყო, როდესაც ქეთევან ალოლაშვილმა და კრისტიან ჰუბერმა ველისციხეში ვენახების გაშენება გადაწყვიტეს. დღეს 12-ჰექტარ მამულში ღვინო ტრადიციულ ქვევრებში მზადდება, ოჯახური მემკვიდრეობისა და ქართული მეღვინეობის ტრადიციების საფუძველზე.

ორი მარანი არი არის არტიზანული ღვინის მცირე მარანი, რომელიც 2017 წელს ბასტიენ ვარსკოტემ და ნინო გვანცელაძემ შიდა ქართლის სოფელ იგოეთში დააარსეს. მარანი ძირითადად ცქრიალა ღვინოებზეა სპეციალიზებული, თუმცა სხვადასხვა სტილის ღვინოებსაც აწარმოებს. ღვინოები სპონტანური დუღილით მზადდება ძველ ფრანგული მუხის კასრებში ან ტრადიციულ ქართულ ქვევრში და გაუფილტრავი ისხმება ბოთლებში.

ბაადურ 1933 საოჯახო მეღვინეობაა ზემო იმერეთში, საჩხერეში, რომელიც ღვინის დაყენების თითქმის საუკუნოვან ტრადიციას აგრძელებს. ადგილობრივი ვაზის ჯიშებისგან შექმნილი ღვინოები გამოირჩევა სიხალისით, დახვეწილი სტრუქტურითა და უნიკალური ხასიათით.

მირიანის მარანი ბაღდათის მუნიციპალიტეტის სოფელ ფერსათში მდებარე საოჯახო მარანია, რომელიც 2016 წელს დაარსა მირიან იოსებაშვილმა. იგი საკუთარ ვენახში მოყვანილი ცოლიკოურის, კრახუნას, კუნძას, ძელშავისა და ოცხანური საფერესგან ღვინოს ტრადიციული მეთოდით აყენებს.

ფერისათი ნემსაძის საოჯახო მარანია იმერეთში, რომელიც ქართული ღვინის მემკვიდრეობას თანამედროვე ევროპულ ესთეტიკასთან აერთიანებს. ჩვენი უნიკალური იმერული საფერავი, ციცქა და ცოლიკოური ქვევრში შექმნილი ბუნებრივი ღვინოებია, რომლებიც საქართველოს მრავალფეროვან ტერუარს გამორჩეულად წარმოაჩენს.

2007 წელს, ნახშირღელეში, რამაზ ნიკოლაძემ თავისი დიდი ბაბუის ვენახის ადგილზე პატარა მარანი დააარსა. აქ ციცქასა და ცოლიკოურისგან ბუნებრივ ღვინოს ამზადებენ. ტრადიციული ქვევრის მეთოდი და ხელით მოვლილი ვენახი იმერული ღვინის ავთენტურ ხასიათს ინარჩუნებს.

2007 წელს ნუგზარმა და მამუკამ დააარსეს „სიმონიკა“ საოჯახო მეღვინეობა, რომელიც მდებარეობს იმერეთში, II ობჩაში და მათი მამის სახელს ატარებს. მეღვინე ნინი ჩხეიძე აგრძელებს მეღვინეობის სამთაობიან ტრადიციას და აწარმოებს ნატურალურ ქვევრის ღვინოებს იმერეთსა და სამეგრელოში მდებარე საკუთარ ვენახებიდან.

მეღვინეობა ნაფერები მდებარეობს კინძმარაულის მიკროზონაში, ნეკრესის მონასტრის სიახლოვეს, საკუთარ ვენახებში. მეღვინეობა აერთიანებს ქართულ ტრადიციებსა და თანამედროვე მიდგომებს, ქმნის გამორჩეული ხასიათის ღვინოებს და განსაკუთრებულ ყურადღებას უთმობს ხარისხს, ბუნებრიობასა და ავთენტურობას.

თენგიზ დვალიშვილის მეღვინეობა მდებარეობს შიდა ქართლში, სოფელ ხიდისთავში. მარანი აწარმოებს ბუნებრივ ღვინოს ქართლის ენდემური ჯიშებიდან, როგორც ტრადიციული, ასევე კლასიკური მეთოდით. ვენახს და მარანს უძღვება თენგიზ დვალიშვილი, რომელიც მეექვსე თაობის წარმომადგენელია დვალიშვილების ოჯახიდან.  

ოჯახური მეურნეობაა, რომელიც ნუკრი ქურდაძემ 2002 წელს დააარსა და კახეთში, სოფელ ახაშენში, ფაფრის მინდვრებზე მდებარეობს. 2018 წლიდან მარანი სერტიფიცირებულ ორგანულ ღვინოსა და ჭაჭას აწარმოებს. ჩვენი მისიაა ქართული ქვევრისა და თანამედროვე მეღვინეობის საუკეთესო სინთეზის პოვნა და ყველაზე მნიშვნელოვანის — ქვევრის ღვინის არსის — შენარჩუნება.

მარანი „ხაჟალია“, საოჯახო მეღვინეობა, იმერეთში, სოფელ გეგუთში მდებარეობს. ის 2022 წელს დაარსდა. მარანი ტრადიციული მეთოდით, ქვევრში, აწარმოებს ბუნებრივ ღვინოებს კახური და იმერული ჯიშებისგან. წლიური წარმოება 3,500 ბოთლს შეადგენს, რაც ხარისხის კონტროლსა და ავთენტურობის შენარჩუნებას უწყობს ხელს.

„ენკენი“- ლაშა გურულის საოჯახო მეღვინეობა, იმერეთში, ახალთერჯოლაში მდებარეობს. მარნის სახელწოდება რთველთან დაკავშირებული დღესასწაულიდან მომდიანრეობს. 2015 წლიდან მარანი იმერულ ტრადიციებს აგრძელებს და ღვინოს 200 წლის ქვევრებში, ადგილობრივი ჯიშებისგან, ბუნებრივი მეღვინეობის პრინციპებით აწარმოებს.

ჯუსო არის საოჯახო მარანი კახეთში, რომელიც 2017 წლიდან ბუნებრივ ქვევრის ღვინოებს აწარმოებს. მრავალთაობიანი ტრადიციის აღდგენით, მარანი პატივს მიაგებს ოჯახის წინაპარს, ჯუსოს. მარანი ფლობს 60 წლის საკუთარ ვენახს და ღვინოს რამდენიმე ყურძნის ჯიშისგან აყენებს. 

გუდ ვაინ საოჯახო მარანია ზესტაფონის სოფელ ჭალატყეში, მრავალწლიანი მევენახეობა-მეღვინეობის გამოცდილებით. მარანი წელიწადში დაახლოებით 8,000 ბოთლ ღვინოს აწარმოებს, მათ შორის ციცქას, ციცქა-ცოლიკოურს, ოცხანურის საფერესა და პეტ-ნატს. ახალი ქვევრები და თანამედროვე აღჭურვილობა წარმოების გაფართოების საშუალებას იძლევა.

კახეთში, სოფელ ჩუმლაყში მდებარე ექიმის ბიო-მარანი აწარმოებს ქვევრის ბუნებრივ, ბიო ღვინოებს ახაშენის მიკროზონიდან. ოჯახური მარანი ტრადიციული მეთოდებით, ფილტრაციისა და ხელოვნური დანამატების გარეშე ქმნის ავთენტურ საფერავს, რქაწითელსა და ხიხვს, რომლებსაც მოპოვებული აქვთ საერთაშორისო ჯილდოები.

ტარიელ ლომთაძის მარანი რაჭაში, სოფელ ხვანჭკარაში მდებარეობს. მეღვინეობა ოჯახური ტრადიციაა, განახლებული მარანი კი 2015 წელს დაარსდა. ოჯახს აქვს ერთი ჰექტარი ვენახი, სადაც მოჰყავს ალექსანდროული, მუჯურეთული, წულუკიძის თეთრა და ცოლიკოური. მათი მიზანია მივიწყებული რაჭული ვაზის ჯიშების აღორძინება და მათგან ღვინის წარმოება.

თეძამის მარანი არის პატარა საოჯახო მარანი, რომელიც მდებარეობს შიდა ქართლის სოფელ გარიყულაში. 2017 წლიდან ჩვენს 300 წლის ისტორიის მქონე მარანში ვამზადებთ ბუნებრივ ქვევრის ღვინოებს, ძირითადად, ქართლის ენდემური ვაზის ჯიშებისგან და ვინარჩუნებთ ადგილობრივ ტრადიციებსა და ქართული მეღვინეობის უნიკალურ მემკვიდრეობას.

„ვალიკოს ღვინო“ ოჯახური მემკვიდრეობაა, რომელიც 1970-იან წლებში, სიღნაღის სოფელ ილიაწმინდაში, პაპის პატარა ვენახითა და დაუღალავი შრომით დაიწყო. მისმა ენთუზიაზმმა გვასწავლა, რომ ღვინო უნდა იყოს ცოცხალი და ბუნებრივი, როგორც თავად ცხოვრება — გვასწავლა ბუნებრივი ღვინის სიყვარული და დაყენების ოსტატობა.

არჩილ გუნიავას მარანი მცირე საოჯახო მარანია სოფელ კვალითში, იმერეთში. 2 ჰექტარ ვენახში ოჯახი ადგილობრივი ვაზის ჯიშებიდან შვიდი სახეობის ბუნებრივ იმერულ ღვინოს აწარმოებს. ვენახის მოვლა ხელით, ხოლო ღვინის დაყენება ქვევრში, ბუნებრივი საფუვრითა და ხანგრძლივი ჭაჭაზე დაყოვნებით ხდება, რაც იმერულ ტერუარს გამოხატავს.

მენაბდე ილო მენაბდეს ოჯახის ბუნებრივი მეღვინეობაა, რომლის ვენახი და მარანი რაჭაში, სოფელ სადმელში მდებარეობს. ჩვენი მიზანია ბუნებრივი ღვინის წარმოება და რაჭული ყურძნის იშვიათი ჯიშების პოპულარიზაცია, მათ შორის რცხილის, შავი კაბისტონის, წულუკიძის თეთრასა და რაჭული მწვანეს.

ვინომე კისისხევის პატარა, კრაფტ მეღვინეობაა, რომელიც და-ძმამ, თამუკამ და მერაბ არავიაშვილებმა დააარსეს. მათი ღვინოები პაპის დანატოვარი 60 წლის ვენახიდან იწყება — ქართული ტრადიციით, თავისუფლებით, ექსპერიმენტითა და თამამი თვითგამოხატვით.

ანგურა 2020 წელს ძმებმა, გიორგი და ირაკლი ჭიჭინაძეებმა ასურეთში დააარსეს. მარანი ხარისხიან ყურძენსა და მინიმალურ ჩარევაზეა ორიენტირებული, რაც ბუნებას საშუალებას აძლევს, თავისი როლი შეასრულოს ღვინის დაყენების პროცესში. მათი ბუნებრივი ღვინოები გაუფილტრავი, დაუმუშავებელი და დანამატების გარეშეა და ყურძნისა და მისი წარმოშობის ადგილის ხასიათს გამოხატავს.

ვარიანის მარანი საოჯახო მარანია, რომელიც შიდა ქართლში, სოფელ ვარიანში მდებარეობს. ლიახვის ხეობაში, ზღვის დონიდან 690 მეტრზე გაშენებულ საკუთარ ვენახებში, მინიმალური ჩარევით ბუნებრივ ღვინოებს ვაყენებთ, რომლებიც ქართლის ენდემური ვაზის ჯიშების უნიკალურ ხასიათს ავთენტურად გამოხატავს.

მეღვინეობა ართანა 2014 წელს დაარსდა მარტივი იდეით — ოჯახური მეღვინეობის ტრადიციების გაცოცხლებით და მათი ბუნებრივი და გულწრფელი გზით გაგრძელებით. მარანი ბუნებრივ ქვევრის ღვინოებს აწარმოებს და თაობიდან თაობას გადმოცემულ ტრადიციებს მიჰყვება. ოჯახისთვის მეღვინეობა ართანა მხოლოდ მეღვინეობა არ არის — ეს მათი ფესვების, მოგონებებისა და ტრადიციების შენარჩუნების გზაა.

2017 წელს, იმერეთში, სოფელ ძევრში დაარსებული „ბედიანი“ საკუთარი ვენახებიდან მიღებული ყურძნისგან ბუნებრივ ღვინოებს აწარმოებს. კირქვიან ნიადაგზე გაშენებული ვენახებიდან მიღებული ციცქა, ცოლიკოური და ძელშავი ბუნებრივად დუღდება ჭურჭელში და 11 თვემდე ძველდება, შემდეგ კი გაუფილტრავად, სინთეზური დანამატებისა და გოგირდის გარეშე ჩამოისხმება.

მათიაშვილის მარანი კახეთში მდებარე ბიო-ორგანული მეღვინეობაა, რომელიც ორგანულად მოყვანილი ყურძნისგან ქვევრის ღვინოებს აწარმოებს. ღვინოები კახური ტრადიციული მეთოდით, ფილტრაციისა და ქიმიური დანამატების გარეშე მზადდება. მარანი რეგულარულად მონაწილეობს ადგილობრივ და საერთაშორისო ბიო-ღვინის გამოფენებში.

ახმეტის ღვინის სახლის და კაიას ვენახები კახეთში, ტიბაანსა და ახმეტის შემოგარენშია გაშლილი. ჩვენივე ვენახებიდან ვაწარმოებთ ქისის, ხიხვის, ვარდისფერი რქაწითელის, საფერავის, მწვანესა და რქაწითელის ღვინოებს.

ღვინოს როგორც ქვევრში, ტრადიციული კახური წესით, ისე თანამედროვე მიდგომებით ვაყენებთ.

1887 წელს დაარსებული კოლაგისი კახეთში მდებარე მეხუთე თაობის საოჯახო მეღვინეობაა, რომელიც ხელით მოვლილი ორგანული ვენახებიდან ბუნებრივ ქვევრის ღვინოებს აყენებს. ყოველწლიურად ჯეირანაშვილების ოჯახი 5,000-მდე ბოთლს აწარმოებს — ქარვისფერ, წითელ და პეტ-ნატ ღვინოებს, რომლებიც მინიმალური ჩარევით, ზრუნვითა და ტრადიციის პატივისცემით მზადდება.

ჭორტაულის ვენახები არის ღვინის ჟურნალისტისა და მწერლის, ალეკო ცქიტიშვილის საოჯახო მეღვინეობა. ვენახები და მარანი გურჯაანის მუნიციპალიტეტის სოფელ ბაკურციხეში, ზვარ ჭორტაულში მდებარეობს. ალეკო ცქიტიშვილის მიზანია კახეთის აბორიგენული ვაზის ჯიშების პოპულარიზაცია. ღვინოებს აყენებს რამდენიმე ვაზის ჯიშის ყურძნისგან — რქაწითელი, მწვანე კახური, საფერავი ბუდეშურისებრი, ხიხვი, ქისი და სხვა.

მანავი ვაინსი საოჯახო მარანია კახეთში, სოფელ მანავში, ცნობილი მანავის მიკროზონაში. 6 ჰექტარ ვენახში მოჰყავთ კახური მწვანე, რქაწითელი და საფერავი. მარანი ხარისხზეა ორიენტირებული, ყურძენს ხელით კრეფს და ბუნებრივ ქვევრის ღვინოებს, საფუარისა და დანამატების გარეშე აწარმოებს — როგორც მსუბუქ, ხალისიან თეთრებს, ისე კომპლექსურ ქარვისფერ, ჭაჭაზე დაყენებულ ღვინოებს.

ღვინაძე მცირე საოჯახო მეღვინეობაა კახეთში, სოფელ შილდაში, რომელიც ორგანულად მოვლილი ვენახებიდან ბუნებრივ ქვევრის ღვინოებს აწარმოებს. მარანში ქართული ვაზის ჯიშებისგან, მათ შორის საფერავისა და ცოლიკოურისგან, ტრადიციული მეთოდებითა და მინიმალური ჩარევით იქნმება გაუფილტრავი ღვინო. 

2010 წელს ზურაბ თოფურიძის მიერ დაარსებული საოჯახო მარანი „იბერიელი“ კახეთსა და გურიაში ორგანულად მოყვანილი ადგილობრივი ჯიშებისგან ბუნებრივ ღვინოებს ქვევრში აყენებს. სპონტანური დუღილი, ჭაჭასთან გააზრებული კონტაქტი და გოგირდის მინიმალური გამოყენება ჯიშის, მოსავლისა და ტერუარის ხასიათს წარმოაჩენს.

„ბაკურციხელი“ საოჯახო მარანია კახეთში, ბაკურციხეში, სადაც ბერიძეების ოჯახის მეღვინეობის ტრადიცია საუკუნეზე მეტია გრძელდება. ივანე ბერიძემ, ოჯახის მეღვინეობის ტრადიციის მესამე თაობის წარმომადგენელმა, მარანი 2013 წელს დააარსა და წინაპრებისგან მიღებული მრავალწლიანი მეღვინეობის პრაქტიკა აღადგინა. ოჯახურ ვენახებში ორგანულად მოყვანილ ყურძენს ხელით კრეფენ და მისგან მცირე რაოდენობით ბუნებრივ ღვინოებს აყენებენ.

რერო არის მცირე საოჯახო მარანი, რომელიც იმერეთში, ზესტაფონის მუნიციპალიტეტის სოფელ ფუთში მდებარეობს.
მარანი 2021 წელს ძმებმა, გიორგი და ირაკლი სირაძეებმა, დააარსეს. ისინი ბუნებრივ ღვინოებს ქვევრში აყენებენ, მარნის ირგვლივ გაშენებული იმერული ვაზის სხვადასხვა ჯიშისგან.

ტანინი, რომლის სახელწოდებაც ღვინის ერთ-ერთ მნიშვნელოვან მახასიათებელს უკავშირდება, ემზარ ვასაძის ქართული ღვინის სიყვარულითა და კიკეთში, ზღვის დონიდან 1,200 მეტრზე, დაარსებული მცირე მარნიდან დაიწყო. წლების შემდეგ მამის დაწყებული საქმე მისმა ვაჟმა გააგრძელა და დღეს ტანინი ბუნებრივ მეღვინეობას, ქართულ ტრადიციასა და კიკეთის უნიკალურ ხასიათს აერთიანებს.

მალატი, რაც სვანურად „გულს“ ნიშნავს, თამარ გერლიანის მშობლიურ სვანეთთან ღრმა კავშირს გამოხატავს. მისი ვენახები და მარანი კახეთში, სოფელ საბუეში მდებარეობს, აქ ადგილობრივი ქართული ვაზის ჯიშებისგან ბუნებრივ ღვინოებს ამზადებს, სახელწოდებით კი სვანურ კულტურასა და ენას ეხმიანება.

ჭონას საოჯახო მარანი თელავში, კახეთში მდებარეობს, აქ თაობიდან თაობას გადმოცემული მეღვინეობის ტრადიცია ბუნებრივ ქვევრის ღვინოებში გრძელდება. მისი ბიოორგანულად მოვლილი ვენახები წინანდალსა და მუკუზანშია გაშენებული, სადაც კახური მწვანე, რქაწითელი, ქისი და საფერავი მოჰყავთ. მეღვინეობის თითოეულ ეტაპს თავად ოჯახი უძღვება.

ილტოს ველი ბუნებრივი ღვინის მარანია, რომელსაც მეღვინე-მევენახე ბექა მარტიაშვილი ხელმძღვანელობს. მარანი და ვენახები კახეთში, ახმეტაში, მდინარე ილტოს მარჯვენა სანაპიროზე მდებარეობს. ბექა აგრძელებს წინაპრების მეღვინეობის ტრადიციას და რქაწითელის, ხიხვისა და საფერავისგან განსხვავებული ხასიათის ღვინოებს ქმნის.

2017 წელს დების, თამთასა და ანუკი აივაზიშვილების მიერ დაარსებული „დების ღვინო“ საოჯახო მარანია კარდენახში, კახეთში. საკუთარი ვენახებიდან მიღებული ყურძნით ისინი ტრადიციულ ქვევრის ღვინოებს აყენებენ, მათ შორის საფერავს, რქაწითელს, ქისს, ხიხვსა და კახურ მწვანეს. მათი ღვინოები საერთაშორისო აღიარებასა და ჯილდოებსაც იღებს.

მე ვარ ლაშა სოფრომაძე, სოფრომაძის საოჯახო მარნიდან. ჩვენი მარანი იმერეთში, ბაღდათში მდებარეობს და 1908 წლიდან იღებს სათავეს. ცხრა ქართული, ადგილობრივი ვაზის ჯიშისგან ბუნებისადმი ღრმა პატივისცემით ვქმნით მსუბუქ და ცოცხალ ღვინოებს. ჩვენთვის ღვინო მხოლოდ პროდუქტი არ არის — ეს ცხოვრების წესია და ბუნებისგან სწავლის დაუსრულებელი მოგზაურობა.

ქვემო ქართლში ზაზა დარსაველიძე ერთ ჰექტრამდე ორგანულ ვენახებს ფლობს და ოჯახთან ერთად უვლის. „დასაბამი“ წელიწადში მხოლოდ 3 000 ბოთლ ღვინოს აწარმოებს ქართული ადგილობრივი ჯიშებისგან, რომლებიც ბუნებრივად, ქვევრში, მათ შორის ოჯახიდან მემკვიდრეობით მიღებულ, საუკუნოვან ქვევრში, ღვინდება. მათი ღვინოები ქართული მეღვინეობის თაობებიდან მომდინარე ტრადიციას აგრძელებს.

„ზურაბ კვირიაშვილის ვენახები“ შეიქმნა 2002 წელს და აწარმოებს ბუნებრივი მეთოდით დაყენებულ ქვევრის ღვინოს რქაწითელის, საფერავის, ქისის, ხიხვის და მწვანეს ჯიშის ყურძნისაგან. მარანი მდებარეობს ქალაქ თელავში და მასპინძლობს მსოფლიოს სხვადასხვა კუთხიდან ჩასულ სტუმრებს ღვინით, რომლის დაყენების ტრადიციაც თაობებიდან თაობებს გადმოეცემა.

ველინო არის მცირე ზომის ორგანული საოჯახო მეღვინეობა, რომელიც 2015 წელს კახეთში, საქართველოს უდიდეს მევენახეობის რეგიონში, დაარსდა. ოჯახური მეღვინეობის ტრადიციებზე დაყრდნობით, ველინო ბუნებრივ და მაღალი ხარისხის ღვინოებს ტრადიციული ქვევრის მეთოდითა და ხანგრძლივი ჭაჭაზე დაყოვნებით აწარმოებს. დღეს მისი ღვინოები მსოფლიოს 11 ქვეყანაშია წარმოდგენილი.

ბაიას ღვინო იმერეთში მდებარე საოჯახო მეღვინეობაა, რომელიც 2015 წელს სამმა და-ძმამ დააარსა. ჩვენ ვაწარმოებთ ღვინოებს ქართული ავტოქტონური ვაზის ჯიშებისგან, ტრადიციული ქვევრის მეთოდისა და მევენახეობის ტრადიციების შერწყმით. ჩვენი ღვინოები გამოხატავს იმერეთის უნიკალურ ტერუარსა და საქართველოს მდიდარ მეღვინეობის მემკვიდრეობას.

ჩვენი პატარა მარანი მდებარეობს სოფელ მუკუზანში, რომელიც ქართული მეღვინეობის ერთ-ერთ აღიარებულ კერას წარმოადგენს. ღვინის დამზადებისას ვიყენებთ უძველეს, ტრადიციულ მეთოდებს - დაძველებას, დუღილს, შენახვას და დავარგებას. ჩვენი ღვინო ვარგდება ქვევრში. ამის წყალობით, მას აქვს არა მხოლოდ დახვეწილი, შეუდარებელი და არაჩვეულებრივი გემო, არამედ აქვს მთელი რიგი სასარგებლო თვისებები, რადგან ის სრულიად ბუნებრივია და არ შეიცავს კონსერვანტებს და გოგირდს.

პატარა მარანი მცირე საოჯახო მარანია, რომელიც კახეთის უნიკალურ მიკროზონებში — ახოებსა და წარაფში მდებარეობს. უკვე ორი ათწლეულია, ოჯახი ქართული მეღვინეობის ტრადიციას აგრძელებს და რქაწითლისა და საფერავისგან ავთენტურ ქვევრის ღვინოებს ქმნის. ღვინო ბუნებრივად დუღდება და სულ მცირე ექვსი თვის განმავლობაში ჭაჭასა და კლერტზე მაცერირდება. პატარა მარანი ის ადგილია, სადაც ღვინო მიწიდან იბადება და გულით იქმნება.

ტინო გამორჩეულ ორგანულ ღვინოებს ქმნის მუკუზანის ცნობილ მიკროზონაში. ვენახებს ბუნებისადმი ღრმა პატივისცემით ვუვლით და უძველეს ტრადიციებს ვინარჩუნებთ, რათა სუფთა და ავთენტური ღვინოები შევქმნათ. თითოეული რთველი ასახავს ჩვენს ერთგულებას მდგრადი მევენახეობისა და ტერუარის უნიკალური ხასიათის მიმართ.

ჟუკა-სანოს ღვინო ბედნიერი ცოლ-ქმრის სახლია, ვენახი და მარანი, მცირე წარმოება ხუთი სახეობის ღვინით და წელიწადში სულ 1,000 ბოთლით. ყველაფერი 2017 წელს დაიწყო, როდესაც წიგნების რედაქტორმა ქალმა დედაქალაქი დატოვა, კახეთის ერთ ლამაზ სოფელში სახლი და ვენახი შეიძინა და ახალი ცხოვრება დაიწყო.

2021 წელს დაარსებული UNARI ქართული ტრადიციული მეღვინეობის მემკვიდრეობას ახალი თაობის ხედვით აგრძელებს. მარანი აერთიანებს საქართველოს სამ განსხვავებულ ტერუარს და მცირე რაოდენობით ქმნის ღვინოებს კახეთისა და ქართლის ადგილობრივი ჯიშებისგან, თითოეული ყურძნის ჯიშისა და ადგილის უნიკალური ხასიათის წარმოსაჩენად.